EDIFICIO MULTIUSOS

Local social de Carragoso

A LANTERNA DA TRIGUEIRIZA

A Trigueiriza, por ubicación, é unha zona céntrica de Lalín; está situada dentro da “améndoa” delimitada polas “Roldas” que circunvalan o casco urbano.
Mais, aínda así, poderíase dicir que case ata a actualidade era unha “zona escura” dentro da nosa vila. Carecía de accesos en condicións, non tiña unhas condicións de urbanización axeitadas no tocante ás redes de servizos urbanos, beirarrúas, ou vías rodadas.
Agora, estas carencias están en boa parte arranxadas, coa recente urbanización executada. Pero aínda se podía facer máis. E é que dotar a esta zona con un equipamento público tal que consiga atraer actividade a este barrio será o broche de ouro para a revitalización e dinamización urbana que Carragoso e a Trigueiriza precisan.
Deste xeito, promóvese a creación dun Edificio Polivalente destinado ó seu uso polos veciños do entorno, e por extensión, a tódolos lalinenses. Un Local Social para Carragoso e para a toda a vila.
Este edificio deberá ser a lanterna que poña o punto de luz definitivo a unhas actuacións de renovación urbana que continuarán, no eido privado, mediante a construción de edificios comerciais e de vivendas.
Estará vencellado fortemente ó entorno, integrándose nunha zona verde pública na marxe do Rego dos Valados, completando así un equipamento de lecer conxunto de espazo público aberto e pechado.
A edificación conformarase mediante a execución de tres volumes: unha solaina, ou soportal, orientado ó sur, marcará a entrada, deixando un amplo espazo aberto e cuberto, propicio para o encontro previo ou posterior ás actividades, e organizando a entrada; o segundo volume será o espazo de estancia e desenrolo destinado a tódalas actividades que se pretenda realizar nel; e o terceiro, ó norte, no fondo da parcela, con función de escenario e almacenaxe.
No acceso ó interior do edificio atoparemos un vestíbulo, que comunicará cunha zona de aseos e limpeza, e coa sala de usos múltiples. Dispoñerase aquí un acceso á entreplanta, só a efectos de mantemento, dado que esta albergará a maior parte das instalacións da edificación, situándose sobre aseos e cociña, e deixándose así toda a altura libre no resto do edificio para dispor dun espazo amplo e luminoso.
A cociña contará con un acceso directo dende a zona cuberta exterior, e comunícase coa sala de usos múltiples, permitindo a vista entre elas, con vidros corredizos, permitindo a visibilidade e interconexión espacial que posibilitarían non só comidas comunitarias, senón tamén a realización de cursos de cociña ou eventos similares.
Dispónse a continuación dunha ampla sala de usos múltiples, que poderá acubillar tanto actuacións, coma cursos, charlas, bailes, reunións de todo tipo, etc. A sala contará con comunicación directa á zona verde exterior, mediante unha ampla porta corredeira, máis outra de saída de emerxencia.
Esta sala está aberta, evidentemente, ó escenario, que se elevará uns 70cm sobre o nivel do chan. Este escenario comunícase co exterior, permitindo a entrada de material a nivel do mesmo, efectuándose un acceso cómodo do material de posibles actuacións. Tras él atopamos unha reserva de espazo destinada a almacenaxe e outras instalacións.
A edificación ten que se adaptar á forma da parcela, así coma á normativa urbanística, polo que aparecen unha serie de recúes que se aproveitan para conformar os volumes da construción.
Está proxectado ademais o acondicionamento da totalidade da parcela municipal, con beirarrúas rodeando a edificación, con acceso rodado exterior ata a zona de escenario, instalacións e almacén, e prevendo un aparcamento restrinxido ós usos específicos da edificación.
A zona precisa dunha lanterna, dun faro que ilumine o camiño. Deste xeito, a edificación proxéctase coma unha caixa de luz. O volume principal, con fachadas translúcidas, permitirá que a luz do exterior entre polo día, e que a luz do interior saia pola noite. Contará cun sistema de iluminación da fachada que dotará á envolvente dunha cortina de luz tal que bañe o entorno inmediato, xerando unha zona agradable e segura pola noite. O trasvase de luz exterior-interior permitirá un aforro enerxético na iluminación.
O proxecto pénsase tendo en mente a máxima eficiencia enerxética. No tocante á obtención de enerxía, está prevista a instalación de paneis solares fotovoltaicos na cuberta do volume principal, feito polo que se executará plana. Estes paneis fotovoltaicos non só alimentarán instantaneamente o consumo da edificación, senón que proxéctase a instalación de baterías que permitirán o almacenaxe da enerxía, de tal xeito que se logrará iluminar o exterior sen custe económico. No caso de conseguirse excedente de enerxía, prevese que a edificación poida abastecer mesmo a iluminación pública da marxe do Rego dos Valados.
Para a climatización prevese a instalación de un sistema xeotérmico que alimente as bombas de calor que climatizarán o espazo, quentando ou arrefriando segundo se demande na edificación. Este sistema consume exclusivamente enerxía eléctrica, que se obterá do sistema fotovoltaico e das baterías en horario nocturno.
Foi preciso deseñar unha edificación cunha envolvente térmica extremadamente eficiente, de tal xeito que se minimizara o consumo enerxético. O illamento proxectado en chans, paredes e teitos é mesmo superior ó esixido por normativa, para acadar niveis especialmente baixos de perdas enerxéticas.
Pero a sostibilidade está presente na execución da edificación non só no tocante á enerxía e ó seu aforro, senón tamén no emprego de materiais.
A maior parte da estrutura resolverase en aceiro, polo que é totalmente reciclable, agás o testeiro da edificación, que por estar parcialmente soterrado, e por funcionar de arriostramento do resto do edificio, proxéctase en formigón armado. As fachadas executaranse en policarbonato, tanto reciclado como reciclable, tomado con perfilerías de aluminio, e remates do mesmo material, con ventás puntuais de vidro.
Polo tanto, a maior parte da edificación é totalmente reciclable, e boa parte dela é executable con materiais reciclados. Cando a súa vida útil remate, a demolición da edificación será sinxela e os materiais serán maioritariamente recuperables.
Pero aínda é máis. O emprego de estruturas, tabicarías e fachadas lixeiras proxéctase para reducir ó mínimo a pegada de carbono, xa que os transportes dos materiais minimizan así o consumo de enerxía.
En definitiva, prevese unha construción eficiente, de baixo consumo, executada con materiais reciclados e reciclables, con funcionamento a través de enerxías renovables, e con posibilidade de producir un excedente de enerxía que permitiría iluminar gratuitamente o entorno inmediato. Un edificio, un faro, que dotará á zona de luz, en tódolos sentidos do termo.